بلوچستان کے علاقے سنجدی میں کوئلے کی کان میں گیس بھرنے کے باعث دھماکا ہوا ہے جس کے نتیجے میں 12 کان کن کان میں پھنس گئے ہیں۔ یہ افسوسناک واقعہ جمعرات کی رات پیش آیا، اور اس کے بعد سے امدادی کارروائیاں جاری ہیں۔

مائنز ڈیپارٹمنٹ اور پی ٹی ایم اے کی ٹیمیں ملبہ ہٹانے میں مصروف ہیں، تاہم گیس کی وجہ سے امدادی کارکنوں کو بھی مشکلات کا سامنا ہے، اور دو ریسکیو اہلکار بیہوش ہو چکے ہیں۔ 14 گھنٹوں کے باوجود ریسکیو آپریشن مکمل نہیں ہو سکا ہے۔

چیف انسپکٹر مائنز کے مطابق دھماکا گیس بھرنے کی وجہ سے ہوا، جس کے بعد کان کا راستہ مکمل طور پر بند ہو گیا تھا، تاہم کئی گھنٹوں کی کوششوں کے بعد راستہ جزوی طور پر بحال کیا گیا ہے۔ ڈپٹی ڈائریکٹر ریسکیو نے بتایا کہ کانکن تقریباً 4200 فٹ کی گہرائی میں پھنسے ہوئے ہیں اور کان کے اندر بجلی کی کیبلز کٹ چکی ہیں، جنہیں دوبارہ بچھایا جا رہا ہے۔

یاد رہے کہ بلوچستان اور خیبر پختونخواہ میں اس سے قبل بھی کوئلے کی کانوں میں دھماکوں کے متعدد واقعات پیش آچکے ہیں، جن میں کئی کان کن جان کی بازی ہار چکے ہیں اور درجنوں زخمی ہو چکے ہیں۔