پاکستانی آم کی دنیا بھر میں مانگ بے پناہ ہے، اور اس کی برآمدات میں اہم پیش رفت دیکھنے کو ملی ہے۔ حال ہی میں قومی اسمبلی میں پیش کی گئی رپورٹ میں انکشاف ہوا ہے کہ برطانیہ پاکستانی آموں کا سب سے بڑا خریدار بن گیا ہے۔
وفاقی وزیر تجارت جام کمال نے گزشتہ پانچ برسوں کے دوران آموں کی برآمدات کی تفصیلات قومی اسمبلی میں پیش کیں۔ رپورٹ کے مطابق، برطانوی شہریوں نے صرف چھ ماہ میں پاکستانی آم خریدنے پر 17.97 ملین ڈالر (تقریباً 4 ارب 98 کروڑ 60 لاکھ 98 ہزار 863 پاکستانی روپے) خرچ کیے ہیں، جس سے یہ بات واضح ہوتی ہے کہ برطانیہ آم کے سب سے بڑے خریدار ممالک میں سرفہرست ہے۔
دیگر اہم برآمدی ممالک میں متحدہ عرب امارات، عمان، جرمنی، کینیڈا، افغانستان، قطر اور سعودی عرب شامل ہیں، جہاں پاکستانی آموں کی مانگ بڑھتی جا رہی ہے۔ پاکستانی آموں کے اعلیٰ معیار اور ذائقے کی وجہ سے دنیا بھر میں ان کی پسندیدگی میں اضافہ ہو رہا ہے، جو نہ صرف ملکی زراعت بلکہ معیشت کے لیے بھی خوش آئند ہے۔