لاہور: پاکستان کی معروف اداکارہ ریشم نے اپنی شادی نہ ہونے کی وجہ ایک منفرد دعا کو قرار دیا ہے، جو انہوں نے اللّٰہ کے گھر میں کی
تھی۔ ایک حالیہ انٹرویو میں ریشم نے اس دعا کا ذکر کیا جس کا مختصر کلپ سوشل میڈیا پر وائرل ہو رہا ہے۔
ریشم نے بتایا کہ وہ ایک ڈرامے کی شوٹنگ چھوڑ کر عمرے کی ادائیگی کے لیے گئیں تھیں، جہاں انہیں کہا گیا کہ مسجد الحرام کے مینار
دیکھ کر جو دعا مانگیں گی وہ قبول ہو گی۔ اس موقع پر ریشم نے دعا کی کہ “یا اللّٰہ، عزت دینا تو کبھی تکبر نہ دینا اور میرا ہاتھ ہمیشہ دینے
والا رکھنا، لینے والا نہ بنانا۔” اداکارہ کے مطابق، ان کی یہ دعا اس طرح قبول ہوئی کہ آج تک انہیں مرد کی کمائی نصیب نہیں ہوئی۔ تاہم، وہ
یہ نہیں جانتیں کہ اس میں اللّٰہ کی کیا حکمت ہے۔
ریشم نے اپنی شادی کی خواہش کا بھی اظہار کیا اور کہا کہ وہ اب زندگی میں سیٹل ہونا چاہتی ہیں اور اللّٰہ سے دعا کی ہے کہ ان کی شادی
کروا دے۔ انہوں نے بتایا کہ کچھ عرصے کے لیے کام چھوڑ دیا تھا، مگر بعد میں دوبارہ کام شروع کرنا پڑا۔
یاد رہے کہ ریشم سوشل میڈیا پر بھی متحرک ہیں اور اپنی ویڈیوز میں غریبوں کے لیے لنگر کا کھانا بناتی ہیں تاکہ وہ اسے تقسیم کر سکیں۔