ادیس ابابا: افریقی ملک ایتھوپیا میں ایک ٹرک دریا میں گرنے کے حادثے میں 71 افراد ہلاک ہوگئے ہیں۔ غیر ملکی خبر ایجنسی کے مطابق یہ
حادثہ ضلع بونا میں پیش آیا جہاں عوام سے بھرا ایک ٹرک بے قابو ہو کر دریا میں جا گرا۔ ہلاک ہونے والوں میں 68 مرد اور 3 خواتین شامل
ہیں۔ حادثے میں زخمی ہونے والے افراد کو بونا جنرل اسپتال میں طبی امداد دی جا رہی ہے۔
بتایا گیا ہے کہ مسافر ایک شادی کی تقریب میں شرکت کے لیے جا رہے تھے۔ ایتھوپیا میں ڈرائیونگ کے معیار کی کمی اور گاڑیوں کی فٹنس
کا فقدان اس نوعیت کے حادثات کی وجہ بنتا ہے، جس کے باعث ہر سال ٹریفک حادثات میں کئی قیمتی انسانی جانیں ضائع ہو جاتی ہیں۔ یاد
رہے کہ 2018 میں بھی ایتھوپیا میں ایک بس کھائی میں گرنے سے 38 افراد ہلاک ہوگئے تھے، جن میں اکثریت طالب علموں کی تھی۔