نئی دہلی (این این آئی) بھارتی دارالحکومت دہلی میں شدید بارشوں کا سلسلہ جاری ہے، جس کی وجہ سے سردی کی شدت میں نمایاں اضافہ ہو گیا ہے۔ ایک دن کی بارش نے دہلی میں 101 سال کا ریکارڈ توڑ دیا۔
بھارتی میڈیا رپورٹس کے مطابق، جمعہ سے ہفتہ کی صبح ساڑھے 8 بجے تک دہلی میں 41.2 ملی میٹر بارش ریکارڈ کی گئی، جو دسمبر میں ایک دن کی سب سے زیادہ بارش کا 1923 کا ریکارڈ توڑنے میں ناکام رہا، جب دہلی میں 75.7 ملی میٹر بارش ہوئی تھی۔
رپورٹ کے مطابق دہلی اور اس کے قریبی علاقوں میں تیز بارشوں کا سلسلہ بدستور جاری ہے، جس کے باعث درجہ حرارت تیزی سے کم ہو کر 13 ڈگری سینٹی گریڈ تک گر گیا ہے۔ بارشوں کے اس غیر متوقع سلسلے نے دہلی کے شہریوں کو حیران کر دیا ہے، اور سردی کی شدت کے سبب روزمرہ زندگی متاثر ہو رہی ہے۔