بھارتی اداکارہ اروشی روٹیلا حالیہ دنوں میں اپنے گانے ’’دابیدی ڈبیدی‘‘ کی کوریوگرافی کی وجہ سے شدید تنقید کا سامنا کر رہی تھیں، اور اب خبریں گردش کر رہی ہیں کہ ان کے مناظر کو تیلگو فلم ’’ڈاکو مہاراج‘‘ کے OTT ریلیز سے ہٹا دیا گیا ہے۔ یہ افواہیں اس وقت پھیلیں جب نیٹ فلکس پر فلم کے پوسٹر میں اروشی روٹیلا کا نام اور تصویر شامل نہیں کی گئی۔
اروشی روٹیلا نے اس فلم کی بھرپور تشہیر کی تھی اور فلم کے کئی انٹرویوز میں حصہ لیا تھا، جس کی وجہ سے ان کا کردار اور انٹرویوز میڈیا میں بھی بہت چرچا ہوئے تھے۔ ان کی پروموشن کے باوجود نیٹ فلکس پر فلم کے پوسٹر سے ان کا غائب ہونا مداحوں کے لیے ایک بڑا سوال بن چکا ہے۔
سوشل میڈیا پر اس حوالے سے مختلف قیاس آرائیاں کی جا رہی ہیں۔ بعض لوگ اس صورتحال کو ایک مارکیٹنگ اسٹرٹیجی سمجھ رہے ہیں، جبکہ کچھ افراد اسے اروشی کے کردار کو کم کرنے کی کوشش قرار دے رہے ہیں۔ تاہم، نیٹ فلکس یا فلم کی پروڈکشن ٹیم کی جانب سے اس معاملے پر کوئی باضابطہ تصدیق نہیں کی گئی۔
فلم ’’ڈاکو مہاراج‘‘ نے باکس آفس پر زبردست کمائی کی تھی، اور اب اس کی OTT ریلیز کا وقت قریب آ رہا ہے۔ شائقین کی نظریں 21 فروری 2025 کو نیٹ فلکس پر فلم کی ریلیز پر مرکوز ہیں تاکہ یہ معلوم کیا جا سکے کہ آیا اروشی کے مناظر حقیقت میں ہٹا دیے گئے ہیں یا یہ محض ایک افواہ ہے۔ اس وقت تک یہ سوال برقرار رہے گا کہ فلم کی پروموٹر اور اداکارہ کے مناظر کو کیوں ہٹایا گیا۔